Jólasveinakönnun

Endilega svarið könnuninni hér til hliðar.  Sumir telja sig eiga hagsmuna að gæta, ég nefni engin nöfn en hann er einstakur áhugamaður um hvers kyns hurðir og hvernig skella megi þeim sem fastast.

Annars má nú segja að stórir jafnt sem smáir njóti sín sérstaklega vel þessa dagana þegar jólaundirbúningurinn er hafinn.  Börnin njóta þess sem aldrei fyrr að skoða jólaskrautið, lesa jólasögur og gæða sér á öllum smákökusortunum.  Á laugardaginn fórum við á Krókinn og börnin horfðu á þegar jólaljósin á jólatrénu voru tendruð.  Þau fengu líka að fara í reiðtúr á hestvagni.  Og til að kóróna þetta allt þá snjóaði stórum snjókornum á meðan þessu stóð.  Um kvöldið var svo jólahlaðborð Hólaskóla.  Ljúffengur matur, fyndin skemmtiatriði, helling af fólki og góður félagsskapur.

En eins og ég skrifaði hér á undan þá eru það stórir jafnt sem smáir sem njóta sín.  Mér finnst þessi árstími yndislegur og skammdegið finnst mér vera einstaklega heillandi þó ég viti að það eru ekki allir sammála því.  Annar fjölskyldumeðlimur sem teljast á fullorðinn nýtur sín sem aldrei fyrr í desember.  Þá getur hann nefnilega verið hann sjálfur án þess að þurfa að afsaka sig - enda er það löggiltur jólasveinn á ferðinni sem fæddist á jólunum.  Þessi tiltekni fjölskyldumeðlimur hefur hingað til leyft sér ótrúlegustu hluti í nafni sveinka og svo aðeins örfá dæmi séu nefnd þá hefur hann tekið við stjórn lögreglukórsins og troðið sér inn á milli kórmeðlima og sungið hástöfum, kallað yfir alþingismenn á jólaballi að þeir séu jólasveinar sem einhverra hluta vegna þurfa ekki að hírast mest allt árið í Grýluhelli, ávarpað dómsmálaráðherra á þann hátt að hann hafi verið óþekkt barn og fengið hina og þessa fræga og ófræga til að gera alls konar vitleysu.

Já það er óhætt að segja að allir fjölskyldumeðlimir njóta sín vel þessa dagana.  Meira að segja er litla yndið snortið af jólaljósunum þó hún sé mest upptekin núna af því að fá fyrstu tönnina sína sem gengur ekki þrautalaust fyrir sig.

Njótið aðventunnar.

Athugasemdir

[Þórður Ingi Bjarnason, 1.12.2008 kl. 14:06]

Já þeir eru ófáir sem ég hef fengið með mér í söng og gleði í hlutverki jólasveinsins t.d þá fékk ég Halldór Ásgrímsson meðan hann var forsætisráðherra að syngja með mér jólasveinar ganga um gólf.  Ég hef stjórnað umferð stoppað lögregluna og látið hana gleyma sér á ljósum og ég gæti talið upp langan lista af prakkarastrikumm Hurðaskellis.  Þetta er erfitt líf að þurfa að leika í 11 mánuðu á ári og fá að vera eðlilegur í einn mánuð.

kv

Hurðaskellir Leppalúðason

[Harpa Hrönn (IP-tala skráð) 11.12.2008 kl. 08:55]

Valkvíði, valkvíði, ég get ekki valið jólasvein, verð ég, mega ekki bara allir vera bestir, ekki setja svona pressu á mig